कमला नदीमा पानीको बहाव बढ्दो, नदी आसपासका बासिन्दालाई सतर्क रहन आग्रह

सिरहा : सिन्धुलीस्थित कमला नदीमा पानीको बहाव बढ्दै गएपछि सिरहामा पनि सतर्कता अपनाउन आग्रह गरिएको छ ।

धनुषा र सिरहा जोड्ने कमला नदीमा समेत पानीको बहाव बढ्न सक्ने सम्भावनालाई मध्यनजर गर्दै जिल्ला प्रहरी कार्यालय सिरहाले नदी आसपासका बासिन्दालाई उच्च सतर्कता अपनाउन आग्रह गरेको हो ।

ADVERTISEMENT

जिल्ला प्रहरी कार्यालय सिरहाले मंगलबार सूचना जारी गर्दै कमला नदी आसपासमा बसोबास गर्ने सर्वसाधारणलाई सावधानी अपनाउन अनुरोध गरेको छ ।

प्रहरीले नदीको बहाव बढ्न सक्ने भएकाले नदी किनारमा नजान, बालबालिका तथा ज्येष्ठ नागरिकलाई विशेष ध्यान दिन र जोखिमपूर्ण गतिविधि नगर्न आग्रह गरेको छ ।

जिल्ला प्रहरी कार्यालय सिरहाका प्रहरी निरीक्षक एवं निमित्त प्रवक्ता नरेश लिम्बुका अनुसार बाढी तथा नदीजन्य जोखिमबाट सुरक्षित रहन आवश्यक सावधानी अपनाउन सर्वसाधारणलाई अनुरोध गरिएको छ ।

कुनै समस्या वा जोखिमको अवस्था देखिएमा तत्काल नजिकको प्रहरी कार्यालय वा प्रहरीलाई जानकारी गराउनसमेत आग्रह गरिएको छ ।