दुई देशको राहदानी बोकेर काठमाडौं आएका भारतीय नागरिकलाई नेपाल प्रवेशमा रोक

स्रोतका अनुसार बैंककबाट थाई एयरवेजको उडान TG-319 मार्फत बिहीबार काठमाडौं आइपुगेका भारतीय नागरिक आकाश दीप (Akash Deep) सँग भारत र पेरुका दुई वटा राहदानी फेला परेपछि विमानस्थलस्थित अध्यागमन कार्यालयले उनलाई नियन्त्रणमा लिएर सोधपुछ गरेको थियो।

प्रारम्भिक जाँचका क्रममा उनीसँग भारतको राहदानी नम्बर U4932468 र पेरुको राहदानी नम्बर 125927797 रहेको भेटिएपछि अध्यागमनले नेपाल प्रवेश अनुमति नदिई विमानस्थलको डिटेन्सन कक्षमा राखेको थियो। त्यसपछि सोही दिन राति थाई एयरवेजकै TG-310 उडानमार्फत उनलाई बैंकक फिर्ता पठाइएको स्रोतले जनाएको छ।

ADVERTISEMENT

घटनाबारे अध्यागमन अधिकारीहरूले औपचारिक प्रतिक्रिया दिएका छैनन्। दुई देशका राहदानी कसरी प्राप्त गरिएका हुन्, दुवै राहदानीको वैधता के हो तथा ती कागजात कुन प्रयोजनका लागि प्रयोग गरिएका थिए भन्ने विषयमा सम्बन्धित निकायले थप अनुसन्धान गरिरहेको स्रोतको भनाइ छ।

नेपालको अध्यागमन कानुनअनुसार शंकास्पद यात्रा कागजात, गलत विवरण वा प्रवेशका आवश्यक सर्त पूरा नगरेका विदेशी नागरिकलाई नेपाल प्रवेशमा अस्वीकार गरी सम्बन्धित एयरलाइन्समार्फत फिर्ता पठाउन सकिने व्यवस्था छ।

यस घटनाबारे अध्यागमन विभाग वा अन्य सम्बन्धित सरकारी निकायबाट भने हालसम्म आधिकारिक पुष्टि सार्वजनिक भएको छैन।