विकासका लागि गौरवका योजना समयमा सम्पन्न हुनुपर्छ : मुख्यमन्त्री सिंह

जनकपुरधाम : मधेश प्रदेशका मुख्यमन्त्री सतिशकुमार सिंहले मधेश प्रदेशमा विकासका धेरै सम्भावना भए पनि त्यसको खोज तथा सही व्यवस्थापन नभएका कारण मुलुकको समग्र विकासले गति लिन सकेकाे बताए ।

मुख्यमन्त्री तथा मन्त्रीपरिषद्को कार्यालय र श्रम तथा यातायात मन्त्रालयको संयुक्त आयोजनामा भएको कार्यशालामा उनले मधेश प्रदेशको द्रुत आर्थिक विकासका लागि सञ्चालनमा रहेका राष्ट्रिय महत्वका योजनाहरूको निर्माणमा गति दिन आग्रह गर्दै वर्षौँसम्म योजनाहरू पुरा नहुँदा मुलुकको समग्र आर्थिक विकासमा नकारात्मक असर पारिरहेको बताए ।

मुख्यमन्त्री सिंहले मधेशलाई राजधानीसँग जोड्ने फाष्ट ट्रयाक र हुलाकी राजमार्गको समयमा निर्माण भएको खण्डमा वर्षेनि अरबौँको डिजेल तथा पेट्रोलको खपतमा कमी हुने भएकाले त्यसतर्फ ध्यान दिन जरुरी रहेको भने ।

मधेश प्रदेशका श्रम तथा यातायात मन्त्री कौशलकिशोर रायले मधेश प्रदेशको आर्थिक विकासका लागि कृषि, पर्यटन तथा उद्योगको विकासका लागि ठोस नीति बनाउन आवश्यक रहेको बताए ।

कार्यक्रममा मधेश प्रदेशका नीति तथा योजना आयोगका उपाध्यक्ष डा. सोहनप्रसाद साहले मधेश प्रदेशको समृद्धि र विकासका लागि संघ, प्रदेश तथा स्थानीय तहका बीचमा नीतिगत सुधारका साथै कार्यगत सहकार्य जरुरी रहेको बताए ।

कार्यक्रममा मधेश प्रदेशका नीति तथा योजना आयोगका सदस्यहशशरू डा. शिला मिश्र, डा. राजकुमार सिंह, डा. रिना यादव लगायतले मधेश प्रदेशको समृद्धि तथा विकासका लागि क्षेत्रगत रूपमा कार्यपत्र प्रस्तुत गरेका थिए ।

मधेश प्रदेशका प्रमुख सचिव लोकनाथ पौडेल, श्रम तथा यातायात मन्त्रालयका सचिव सुरेन्द्र पौडेल लगायतका वक्ताहरूले कानूनी जटिलतामा सुधार गरेर अघि बढ्न जरुरी रहेको बताए ।