मधेश सरकारले ल्यायो ‘एक व्यक्ति, एक विरुवा’ देखि मयूर संरक्षणसम्मको कार्यक्रम

जनकपुरधाम : जनमत पार्टीको नेतृत्वमा रहेको मधेश प्रदेश सरकारले आगामी आर्थिक वर्ष २०८२/०८३ का लागि सार्वजनिक गरेको नीति तथा कार्यक्रममा वातावरण संरक्षण र जैविक विविधताको प्रवर्द्धनमा जोड दिएको छ।

शुक्रबार प्रदेश सभामा प्रस्तुत नीति तथा कार्यक्रममा ‘एक व्यक्ति, एक विरुवा’ अभियान मात्र नभई जलमग्न क्षेत्र, तलाव, पोखरी र सिमसार क्षेत्रमा कमलको बीउ छर्ने र जलवृक्षारोपण कार्यक्रम समावेश गरिएको छ। यी कार्यक्रममार्फत जल-पर्यावरण संरक्षणलाई संस्थागत ढंगले अगाडि बढाउने सरकारको योजना रहेको छ।

ADVERTISEMENT

त्यसैगरी, मधेशको संस्कृति र पहिचानसँग जोडिएको मयूरको संरक्षणसमेत नीति कार्यक्रमको प्राथमिकतामा परेको छ। मयूर संरक्षण कार्यक्रममार्फत यस पक्षीको आवास क्षेत्रको संरक्षण, प्रजनन तथा निगरानी कार्यलाई प्रभावकारी बनाइने जनाइएको छ।

नीति कार्यक्रममा मधेश बोटानिकल गार्डन निर्माणको योजना पनि समावेश गरिएको छ। यस गार्डनमार्फत दुर्लभ वनस्पति तथा औषधीय जडीबुटीको संरक्षण र अनुसन्धान गरिने सरकारको भनाइ छ। साथै, मधेश प्राणी उद्यान (चिडियाखाना) को निर्माणको तयारीसमेत अगाडि बढाइएको छ। यस चिडियाखानाले क्षेत्रीय जैविक विविधताको संरक्षण मात्र नभई शैक्षिक, पर्यटन र अनुसन्धानको दृष्टिकोणले समेत योगदान दिने विश्वास गरिएको छ।

सतिशकुमार सिंह नेतृत्वको मधेश प्रदेश सरकारले ल्याएको यो नीति कार्यक्रमले वातावरणीय सन्तुलन, जैविक विविधताको संरक्षण र प्रदेशको सांस्कृतिक पक्षलाई जोड्ने गरी दीर्घकालीन सोच प्रतिबिम्बित गरेको देखिन्छ।