हुंकार मधेश अभियान घोषणा अघि जसपा नेपालका विद्यार्थी नेता रोशन मिश्रद्वारा पार्टी परित्याग

काठमाडौं : ‘हुंकार मधेश’ अभियानको औपचारिक घोषणा नजिकिँदै गर्दा मधेश केन्द्रित राजनीतिक वृत्तमा पार्टी परित्याग गर्ने क्रम बढ्न थालेको छ। यही क्रममा जनता समाजवादी पार्टी (नेपाल) निकट लोकतान्त्रिक विद्यार्थी संघका केन्द्रीय अध्यक्ष रोशन कुमार मिश्रले पार्टीको साधारण सदस्यसमेत नरहने गरी राजीनामा दिएका छन्।

मिश्रले आज पार्टीका संरक्षकलाई सम्बोधन गर्दै लिखित राजीनामा दिएका हुन्। उनले आफ्नो राजीनामा पत्रमा विद्यार्थी राजनीतिमा लामो समयदेखि सक्रिय रहँदै संगठन तथा मधेशका विभिन्न सवालमा काम गर्ने क्रममा प्राप्त अनुभव, सहयोग र मार्गदर्शनप्रति आभार व्यक्त गरेका छन्।

ADVERTISEMENT

राजीनामा पत्रअनुसार मिश्रले तत्कालीन तराई–मधेश विद्यार्थी फ्रन्टको साधारण सदस्यका रूपमा आफ्नो राजनीतिक यात्रा सुरु गरेका थिए। त्यसपछि क्याम्पस कमिटीको अध्यक्ष, काठमाडौं उपत्यका कमिटीको कार्यवाहक अध्यक्ष, केन्द्रीय सदस्य तथा केन्द्रीय महासचिव हुँदै पछिल्लो करिब चार वर्षदेखि लोकतान्त्रिक विद्यार्थी संघको केन्द्रीय अध्यक्षको जिम्मेवारी सम्हाल्दै आएका थिए।

विद्यार्थी संगठनको नेतृत्वमा रहँदा विद्यार्थीका हकहित तथा अधिकारका विषय उठाउने, संगठनलाई व्यवस्थित बनाउने र विद्यार्थी साथीहरूसँग निरन्तर सम्पर्कमा रहने प्रयास गरेको मिश्रले आफ्नो राजीनामा पत्रमा उल्लेख गरेका छन्। साथै, संगठनको जिम्मेवारी निर्वाह गर्ने क्रममा सहयोग गर्ने अग्रज, सहकर्मी तथा सम्पूर्ण विद्यार्थी साथीहरूप्रति उनले धन्यवाद व्यक्त गरेका छन्।

मिश्रले आफ्नो राजीनामाको कारणबारे भने लामो समयको राजनीतिक यात्रालाई एउटा चरणमा विश्राम दिँदै अब नयाँ अभियानमार्फत अघि बढ्ने निर्णयमा पुगेको बताएका छन्। उनले आफ्नो निर्णय कुनै आवेग वा भावनामा नभई सचेत रूपमा लिएको निर्णय भएको उल्लेख गरेका छन्।

उनले आगामी दिनमा ‘हुंकार मधेश’ अभियानमार्फत अघि बढ्ने प्रतिबद्धता समेत व्यक्त गरेका छन्। विद्यार्थी राजनीतिमा बिताएको समय आफ्नो लागि अनुभव र सिकाइको महत्वपूर्ण चरण भएको उल्लेख गर्दै मिश्रले अब युवा, समाज र मधेशसँग जोडिएका सवालमा स्वतन्त्र रूपमा काम गर्ने सोच अघि सारेका छन्।

‘हुंकार मधेश’ अभियान पछिल्लो समय विभिन्न राजनीतिक पृष्ठभूमिका मधेशी युवाहरूलाई जोड्ने प्रयासका रूपमा अघि बढिरहेको छ। सार्वजनिक विवरणअनुसार जनता समाजवादी पार्टी नेपाल, जनमत पार्टी, राष्ट्रिय मुक्ति पार्टी, नागरिक उन्मुक्ति पार्टीलगायत नेपाली कांग्रेस, नेकपा एमाले र नेकपा माओवादी केन्द्रमा आबद्ध वा आबद्ध रहेका युवाहरूको सहभागितामा अभियान अघि बढाइएको छ। अभियानले अधिकार, पहिचान, संघर्ष, जागरण र परिवर्तनलाई आफ्ना प्रमुख उद्देश्यका रूपमा प्रस्तुत गरेको छ।

यसअघि पनि ‘हुंकार मधेश’ अभियानसँग जोडिँदै विभिन्न राजनीतिक पृष्ठभूमिका नेताहरूले पार्टीबाट अलग हुने घोषणा गरेका छन्। पछिल्लो समय राष्ट्रिय मुक्ति पार्टी नेपालका महासचिव केशव झासहित नौ जना नेताले पार्टी परित्याग गर्दै आफ्नो आगामी राजनीतिक यात्रा ‘हुंकार मधेश अभियान’सँग जोडिने घोषणा गरेका थिए।

मिश्रको पार्टी परित्यागलाई पनि यही क्रमसँग जोडेर हेरिएको छ। यद्यपि, ‘हुंकार मधेश’ अभियानको आगामी औपचारिक स्वरूप, नेतृत्व संरचना र राजनीतिक कार्यदिशा भने अभियानको सार्वजनिक घोषणापछि थप स्पष्ट हुने देखिन्छ।

मिश्रले आफ्नो राजीनामा पत्रको अन्त्यमा विद्यार्थी राजनीतिमा प्रत्यक्ष वा अप्रत्यक्ष रूपमा साथ दिने सबैप्रति पुनः आभार व्यक्त गर्दै आगामी दिनमा नयाँ राजनीतिक यात्रामा अघि बढ्ने संकेत गरेका छन्।

‘हुंकार मधेश’ अभियानका अभियन्ताहरूले यसअघि अभियानलाई तत्काल कुनै एक राजनीतिक दलको विकल्पका रूपमा नभई मधेशको अधिकार, पहिचान तथा राजनीतिक पुनर्जागरणका विषयमा बहस र जनसम्पर्क अघि बढाउने साझा पहलका रूपमा प्रस्तुत गरेका छन्।

रोशन कुमार मिश्रको राजीनामासँगै विद्यार्थी राजनीतिमा सक्रिय रहेका अन्य युवाहरू पनि आगामी दिनमा ‘हुंकार मधेश’ अभियानतर्फ आकर्षित हुन्छन् वा हुँदैनन् भन्ने विषयलाई मधेशको बदलिँदो राजनीतिक समीकरणमा चासोका साथ हेरिएको छ।