राजदेवी नपा–९ ब्रह्मपुरीका बाढीपीडितलाई राहत वितरण

रौतहट : अविरल वर्षापछि आएको बाढीले रौतहटको राजदेवी नगरपालिका–९, ब्रह्मपुरी क्षेत्रमा ठूलो जनधन तथा सम्पत्तिको क्षति पुर्‍याएको छ। प्रत्येक वर्ष दोहोरिने बाढी र डुबानले यस क्षेत्रका बासिन्दाको जनजीवन अस्तव्यस्त बन्ने गरेको छ।

यस वर्षको बाढीमा करिब ५० घरधुरी पूर्ण रूपमा जलमग्न हुँदा धेरै परिवारहरू आश्रयविहीन र खाद्यान्नविहीन बनेका छन्। ती बाढीपीडित परिवारलाई तत्काल राहतस्वरूप खाद्य तथा अत्यावश्यक सामग्री वितरण गरिएको छ।

ADVERTISEMENT

राहत वितरण कार्य पूर्व संविधानसभा सदस्य माननीय बाबन सिंह र राजदेवी नगरपालिकाका मेयर प्रत्यासी अंशु सिंहको विशेष पहलमा सम्पन्न भएको हो। राहत सामग्रीमा चामल, तेल, नुन, चिउरा, भुजा, चाउचाउ, बिस्कुट, आलु, प्याज, साबुन, ब्रस, पेस्ट, सलाइ, धुने साबुनलगायत करिब १५ प्रकारका दैनिक उपभोग्य वस्तुहरू समावेश छन्।

यस राहत अभियानमा अमेरिकामा रहेका नेपालीहरूको संस्था **‘सपना संस्था’**ले महत्वपूर्ण सहयोग प्रदान गरेको छ। संस्थाले बाढीपीडितका लागि सहयोग रकम पठाई राहत सामग्री खरिद र वितरणमा प्रत्यक्ष साथ दिएको जनाइएको छ।

राहत वितरणका क्रममा पूर्व संविधानसभा सदस्य बाबन सिंहले भने, “दुखको घडीमा सानो सहयोग पनि ठूलो सहारा हुन्छ। घर सुख्खा हुँदा मासु-भात खुवाएर हैन, संकटका क्षणमा एक छाक खाना दिनु नै मानवता हो।”

त्यस्तै, बाबन सिंह र मेयर प्रत्यासी अंशु सिंहले बाढीपीडितहरूको दीर्घकालीन समाधानका लागि स्थायी तटबन्ध र प्रभावकारी निकास प्रणाली निर्माणको आवश्यकता रहेको बताउँदै योजनाबद्ध रूपमा पहल गर्न सम्बन्धित निकायको ध्यानाकर्षण गराएका छन्।

बाढीका कारण ब्रह्मपुरी क्षेत्रमा धानबाली डुबानमा परेका छन्, घरहरू क्षतिग्रस्त भएका छन्, पशुधन नोक्सानी र स्वास्थ्य जोखिम समेत बढेको छ। स्थानीयवासीहरूले तत्काल राहत पाए पनि दीर्घकालीन पुनःस्थापनाका लागि सरकार र सरोकारवालाहरूको सक्रिय भूमिका र स्थायी समाधानको माग गरेका छन्।

सपना संस्था र सहयोगी सबै नेपाली समुदायप्रति स्थानीय बासिन्दाले आभार व्यक्त गरेका छन्।