सिरहामा २२ महिनापछि भारतीय मदिरा तस्कर प्रहरीको फन्दामा, भाग्न खोज्दा गोली लाग्यो

सिरहा : ज्यानसम्बन्धी कसुरमा फरार रहेका एक प्रतिवादीलाई प्रहरीले २२ महिनापछि गोली प्रहार गरी पक्राउ गरेको छ । जिल्ला प्रहरी कार्यालय सिरहाका अनुसार पक्राउ पर्नेमा सिरहाको नरहा गाउँपालिका–५ का ३७ वर्षीय मोहम्मद कुरवान मंसुरी रहेका छन् ।

प्रहरीका अनुसार भारततर्फ ठूलो परिमाणमा मदिरा तस्करी भइरहेको भन्ने गोप्य सूचनाका आधारमा प्रहरी टोलीले सिरहाको बरियारपट्टी गाउँपालिका–१, कचनारीस्थित नेपाल–भारत सीमा नजिक चेकजाँच गरिरहेको थियो । सो क्रममा भारततर्फ जाँदै गरेको टाटा सफारी गाडीलाई रोक्ने क्रममा गाडीका चालक तथा धनीसमेत रहेका मंसुरीले प्रहरीको नियन्त्रणबाट उम्किन खोजेको प्रहरीले जनाएको छ ।

ADVERTISEMENT

प्रहरीका अनुसार मंसुरीले गाडी नरोकी प्रहरीलाई ठक्कर दिने प्रयास गर्दै भाग्न खोजेपछि प्रहरीले नियन्त्रणमा लिन खोजेको थियो । त्यस क्रममा प्रहरीले गोली चलाएको जनाएको छ। गोली लागेर घाइते भएका मंसुरीको बायाँ हातको कुहिना तथा दाहिने खुट्टाको घुँडामा चोट लागेको प्रहरीले जनाएको छ ।

घाइते मंसुरीलाई नियन्त्रणमा लिएपछि उपचारका लागि प्रादेशिक अस्पताल सिरहा लगिएको थियो। अस्पतालमा उपचाररत उनको अवस्था मध्यम रहेको प्रहरीले जनाएको छ ।

प्रहरीका अनुसार मंसुरी ज्यानसम्बन्धी कसुर मुद्दामा लामो समयदेखि फरार थिए । उनी घटनापछि भारततर्फ लुकीछिपी बस्दै आएको र नेपाल आएको अवस्थामा पक्राउ गरिएको प्रहरीको भनाइ छ ।

घटनास्थलबाट प्रहरीले मदिरा तस्करीमा प्रयोग भएको टाटा सफारी गाडीसहित अन्य व्यक्तिलाई समेत नियन्त्रणमा लिएको जनाएको छ । घटनाबारे थप अनुसन्धान भइरहेको जिल्ला प्रहरी कार्यालय सिरहाले जनाएको छ ।