धनुषाधाम संरक्षित वन धार्मिक तथा पर्यटकीय हिसाबले महत्वपूर्ण : मन्त्री यादव

जनकपुरधाम : विश्व वातावरण दिवसको अवसर पारेर मधेश प्रदेशका वन तथा वातावरण मन्त्री संजय यादवले धनुषाधाम संरक्षित वनको अवलोकन गरेका छन्। मन्त्री यादवसँगै प्रदेश वन निर्देशक जगन्नाथ प्रसाद जयसवाल, धनुषाका डिभिजनल वन अधिकृत विनोद सिंहलगायतको टोली सहभागी थियो।

धनुषाधामको वन क्षेत्र अवलोकन गर्दै मन्त्री यादवले धार्मिक तथा पर्यटकीय दृष्टिकोणले अत्यन्त महत्वपूर्ण रहेको भन्दै संरक्षित वनको संरक्षण र विकासका लागि आवश्यक पहल गरिने प्रतिबद्धता जनाए। “यहाँ पर्यटन प्रवर्द्धनका धेरै सम्भावना छन्, हामी यसकाे लागि सक्दो सहयोग गर्छाै‌,” मन्त्री यादवले भने।

ADVERTISEMENT

कार्यक्रममा धनुषाधाम वन संरक्षण परिषदका पदाधिकारी, धनुषाधाम सब-डिभिजन वन कार्यालयका प्रमुख शंकरनारायण झा, अन्य वन अधिकृत, कर्मचारी तथा स्थानीय वनकर्मीहरूको उपस्थिति रहेको थियो।

अवलोकनका क्रममा मन्त्रीसहितको टोलीले संरक्षित वन क्षेत्र, निर्माणाधीन रामायण बाटिका, श्मशान घाट लगायतका स्थानहरूको निरीक्षण गरेको थियो। साथै श्मशान घाटको प्रवेशद्वार नजिक वर र पिपलका बिरुवा रोपेर हरियाली प्रवर्द्धनको सन्देश पनि दिएका थिए।

वन तथा वातावरण मन्त्रालयका अनुसार धार्मिक, ऐतिहासिक र प्राकृतिक महत्व बोकेको धनुषाधाम संरक्षित वन क्षेत्रको दिगो संरक्षण र पूर्वाधार विकासमा आगामी दिनमा विशेष ध्यान दिइनेछ।