हार्दिक श्रद्धाञ्जली : बुबा, तपाईं बिना ११ वर्ष

आज ठीक ११ वर्ष पुग्यो, बुबा तपाईं हामीलाई छाडेर जानुभएको। समय त आफ्नो गतिमा बगिरहेकै छ, तर तपाईंको याद भने हाम्रो मनको कुनाकानीमा अझै उस्तै ताजा भएर बसेको छ। जीवन अघि बढेको देखिन्छ, तर हरेक मोडमा तपाईंको अभाव झनै गहिरिँदै गएको छ।

तपाईंले छाडेर जानु भएको त्यो दिन, हामीले केवल तपाईंलाई मात्र होइन, हाम्रो आत्मविश्वास, हाम्रो छायाँ, हाम्रो सुरक्षा अनि सल्लाह दिने व्यक्तिलाई गुमाएका थियौं। तपाईं हुनुहुन्थ्यो घरको स्तम्भ, जसले सबैलाई सम्हालेर राख्न सक्नुहुन्थ्यो। आज पनि, कुनै कठिन निर्णय लिनु पर्‍यो भने, मनभित्र तपाईंको अनुहार देख्छु सधैं शान्त, विवेकपूर्ण र ममतामय।

ADVERTISEMENT

तपाईंको अनुशासन, माया र कर्तव्यबोध हामीका लागि पाठशालाजस्तै थियो। बाल्यकालदेखि नै तपाईंले हामीलाई आत्मनिर्भर बनाउने कोसिस गर्नुभयो। कहिलेकाहीँ तपाईंको कठोरतामा रिस उठ्थ्यो, तर आज त्यो सबै तपाईंबाट पाएको अमूल्य सम्पत्ति जस्तो लाग्छ। तपाईंले दिएको शिक्षा र संस्कारले नै आज हामीलाई यो जीवनका आरोह-अवरोह पार गर्न सक्षम बनाएको छ।

बुबा, तपाईं बिना जीवन निरस त छैन, तर अधुरो लाग्छ। तपाईं हुनुहुन्थ्यो भने शायद धेरै कुरा सजिलो हुन्थ्यो। कहिलेकाहीँ लाग्छ , एकपलका लागि भए पनि तपाईं ढोका खोलेर मुस्काउँदै फर्किनुहुन्छ कि? अनि फेरि यथार्थको कठोर सत्य मनलाई भन्छ , तपाईं अब केवल सम्झनामा मात्रै हुनुहुन्छ।

यी ११ वर्षमा हामीले धेरै सिक्यौं जीवनको मूल्य, जिम्मेवारीको गह्रौं बोझ, अनि भावनाको गहिरो समुन्द्र। तपाईंको अभावमा हामी परिपक्व भयौं, तर त्यो परिपक्वता तपाईंको अभावको पीडासँगै जोडिएको छ। तपाईं हुँदा जसरी हामी निश्चिन्त थियौं, त्यो अनुभूति अब केवल यादमा सीमित भएको छ।

तपाईंले देखेका सपना अझै हाम्रो नजरमा ताजा छन्। तपाईंको नाम, तपाईंको सम्मान, तपाईंले देखेको मूल्य सबैलाई जोगाउँदै अगाडि बढ्ने हाम्रो अठोट अझ बलियो बनेको छ। तपाईंले छोडेको अमूल्य विरासत हाम्रो हृदयमा सुरक्षित छ।

आज पनि तपाईंको तस्बिर हेर्दा आँखा रसाउँछन्। शब्दहरू कहिल्यै पर्याप्त हुँदैनन् तपाईंको महत्व बताउन। तपाईं अब हामीसँग भौतिक रूपमा हुनुहुन्न, तर तपाईंको सम्झना, तपाईंको शिक्षा र तपाईंको माया हामीभित्र सधैं जिउँदै छ।

बुबा, तपाईंको योगदानको मूल्य कहिल्यै मापन गर्न सकिन्न। तपाईंको स्थान कसैले लिन सक्दैन। तपाईं हाम्रो आत्मा, हाम्रो हिम्मत र हाम्रो प्रेरणा हो।

तपाईंको सन्तानतर्फबाट हार्दिक श्रद्धाञ्जली।
तपाईं सधैं हाम्रो हृदयमा अमर रहनुहुनेछ।